C-G

Canta gordo, canta gordo,

meu irmán Santiaguiño;

canta gordo, canta gordo

que eu cantarei delgadiño. BS

Canta o cuco, canta o melro,

cantan tódolos paxaros,

eu tamén onte cantei

hoxe choro os meu traballos. FE

Cara de cañoto seco

vai a merda, vai a merda,

que eu contigo non me meto. Ms.2

Carballeira de San Xusto,

carballeira derramada,

naquela carballeiriña

perdín a miña navalla. BS

Carriño das catro rodas

que vas polo empedrado,

desperta a miña morena

que ten o sono pesado. BS

Cartas me viñeron cartas,

cartas do meu queridiño,

cartas me viñeron cartas,

que morrera no camiño. Ms.1

Casei cunha moza en Leiro

que é moi boa costureira,

pero non vai aos mariscos

nin me traballa na leira. CH

Caseime* fora: adios* porta,

portiña do meu quinteiro,

horta do meu saidiño,

sombra do meu laranxeiro. BT

Chamáchesme conacheira

heiche de mandar prender…!

En que feira ti me viches

con conachas a vender? BS

Chamásteme pera verde,

eu a ti mazán podrida,

a pera verde se come,

a mazán podre se guinda. Ms.2

Coloradiña da cara

eu non che quixera ser,

porque a mazán colorada

todos a queren comer. Ms.1

Coma queres que navegue

un navío pola calma,

coma queres que reviva

un corpo que non ten alma. FE

Corazón aleonado

dime quen che aleonou,

pasáchelo río cedo

e a auga che mareou. Ms.1[1]

---

[1] Em BS: Corazón alionado/ dime quen cha alionou/ pasáche-lo río cedo,/ a iauga che mareou.